Rusiya üzərində 129 Ukrayna PUA-sı vuruldu

Hava hücumundan müdafiə sistemləri gecə ərzində Rusiya bölgələri üzərində təxminən 129 Ukrayna dronu məhv edib.

Bu barədə Rusiya Müdafiə Nazirliyi məlumat yayıb.

"Yanvarın 5-də hava hücumundan müdafiə sistemləri Ukraynaya məxsus 129 təyyarə tipli pilotsuz uçuş aparatını ələ keçirərək məhv edib", - deyə məlumatda qeyd olunub.

Bildirilir ki, onlardan 29-u Bryansk, 15-i Belqorod, 13-ü Yaroslavl, 10-u isə Novqorod vilayəti üzərində vurulub.

Bundan əlavə, Smolensk səmasında 9, Kursk və Penza üzərində 7, Tver və Başqırdıstan üzərində 6, Həştərxan və Rostov vilayətləri üzərində 5, Kaluqa üzərində 4, Moskva, Orel və Leninqrad vilayəti üzərində isə 2 qurğu zərərsizləşdirilib.

Voronej, Kostroma, Tula, Tambov, Ryazan vilayətləri, Tatarıstan və Krım üzərində hər birindən bir pilotsuz təyyarə məhv edilib.